Dr Christian Johann Heinrich Heine (* 13. Dezämber 1797 as Harry Heine z Düsseldorf im Herzogdum Bärg; † 17. Februar 1856 z Bariis) isch äine vo de bedütendste dütsche Dichter, Schriftsteller und Schurnaliste im 19. Joorhundert gsi.
Dr Heinrich Heine gältet as äine vo de letzte Verdräter vo dr Romantik und gliichzig as iire Überwinder. Er het d Alldaagssprooch lüürikfähig und s Föiton und dr Räisebricht zur Kunstform gmacht. Er het dr dütsche Liddratuur en eliganti Liichtikäit gee, wo si vorhär nit kennt het. D Wärk vo kuum eme andere dütschsproochige Dichter si bis hüte so hüfig übersetzt und verdoont worde. As kritische, politisch angaschierte Schurnalist, Essayist, Satiriker und Poleemiker het dr Heine Bewunderig aber au Angst gweckt. Im Dütsche Bund het d Oobrikäit iim verbote, z veröffentlige und dorum het er sini zwäiti Lääbenshelfti z Bariis im Exiil verbrocht. D Antisemite und d Nazionaliste häi dr Heine wäge sinere jüüdische Häärkumft und sinere politische Haltig über e Dood uuse aagfindet. D Rolle vom Ussesiter het si Lääbe, si Wärk und däm si Rezepzioonsgschicht brägt.
© MMXXIII Rich X Search. We shall prevail. All rights reserved. Rich X Search